سلوكك مرايتك
قوة التواضع
بقلم د. كريم ابوعيش
التواضع مش ضعف ولا استسلام، التواضع هو إنك تكون عارف قيمتك كويس من غير ما تحس إنك محتاج تثبتها لحد، هو أسلوب عيش بيبان في تصرفات بسيطة كلمة طيبة في وقتها أو إنك تسمع حد بجد من غير ما تقاطعه أو تحاول تفرض رأيك عليه التواضع إنك تعرف إمتى تتكلم وإمتى تسكت وإمتى تسيب أفعالك هي اللي تتكلم عنك.
الشخص المتواضع مش بيدور على تصفيق ولا إشادة، هو بيعمل الصح لأنه مقتنع بيه، أفعاله هادية لكن تأثيرها واضح واحترام الناس ليه بييجي لوحده من غير مجهود ولا تصنع وجوده مريح لأنه مش داخل منافسة ولا مقارنة هو واثق في نفسه وده بيبان من غير كلام كتير.
التواضع بيظهر في تفاصيل صغيرة بنقابلها كل يوم، احترام وقت غيرك وتقدير تعبهم، إنك تعترف بغلطك لما تغلط من غير مبررات ولا دفاع مستمر تصرفات بسيطة لكنها بتصنع فرق حقيقي وبتأكد إن القوة مش في الصوت العالي ولا في السيطرة لكن في الوعي والاحترام.
أحيانًا التواضع بيديك فرصة إنك تتعلم وتفهم أكتر، من غير صدام ولا شد وجذب، مجرد هدوء واستيعاب تصرفك المتواضع بيخلي الناس تشوفك بعين مختلفة وبيخليك تتعامل مع المواقف بثبات وثقة من غير ما تحتاج تثبت نفسك أو تفرض حضورك.
التواضع مش محتاج كلمات كبيرة ولا شعارات هو سلوك بسيط بيبان في كل موقف. لما تختار تحترم غيرك تسمع بصدق وتعترف بغلطك أنت كده بتثبت إنك قوي من جوه. القوة الحقيقية مش في الصوت العالي ولا في فرض السيطرة، لكنها في البساطة اللي بتخلي الناس ترتاحلك وتشوفك على حقيقتك.
سلوكك هو مرايتك والمرايا لا تجامل أحدًا.
