زينة الرجال

زينة الرجال …..

في الهيافه والتفاهه مايعرف محال

قاعد جنب أمه تديلة المصروف والفلوس بالشوال

وكل طلباتك اوامر ومفيش عندنا

صعب أو مستحيل المنال

كل الممنوعات متاحة لجل عيون

 البية زينة الرجال ….

متجوز ست تخرج تشتغل كتفها بكتف الرجال

شقيانه عشان تجيب للبعيد المال

ولو في طريقها اتعطلت وشوية عنه اتأخرت يقولها كنتي فين يا ام العيال

شك وغيرة وكلام خايب ما يخطرش علي البال ،،

اصل بسلامتة البية

زينة الرجال ….

واقف علي الناصية ومعاه شوية عواطليه ودي راحت ودي جاية وفلانه جارتنا رجعت من شغلها متأخرة ياعيني شوية

تعالي نجيب في سيرتها ولا اقولك يالا نغلس عليها احنا وشوية عيال

اصل البية زينة الرجال …..

طلق مراته راح رماها بالعيال

لا مصروف ولا مسؤلية

وهان علية البت وهان علية الواد ولا يدفع جنية ولا حتي ريال

اصل البية زينة الرجال……

هربان بسلامته من التجنيد وخايف يودوه خدمه في حته بعيد يروح سينا ولا السلوم ويمكن اخر الصعيد ويتعب ليه ويشيل سلاح وهو قاعد جنب ماما مرتاح البال

اصل البية زينة الرجال …..

عنده شقة وكام بدلة قاعد يعشم في البنات وديه و ديه بالجواز ويابت انتي حبيبتي وام العيال

 البية بيتسلي وابوة خطبله بنت العم وأمه حاجزة له بنت الخال

اصل البية زينة الرجال ….

الرجولة عزم وقوة وثبات ومش كل ذكر رجل

عايزين نعيد تربية ولادنا وكفاية كده علينا أشباه الرجال

#خاطرة

دكتورة لبنى يونس